قرأت مرة مقولة بتقول
"A woman who cuts her hair is about to change her life."
ممكن مش كنت مقتنعة 100% بصحة المقولة دي، بس إقتنعت بيها جداً مؤخراً.
أنا شعري كان في نص ظهري بالظبط، من حوالي اسبوعين كدة إستلمت جواب من الجامعة بيقول إني إترفضت/تقديمي إترفض في الكلية الفلانية لأسباب كذا كذا. إتضايقت جداً، بس بعدها باسبوع تخطيت الموضوع خلاص و قررت حاجات ثانية لمستقبلي في كليات ثانية، و كانت خلاص هي قراراتي النهائية إللي هتتبني عليها حياتي بعد كدة.
قبل موضوع الجامعة و الجواب ده فضلت فترة طويلة أوي بفكر في إني أقصر شعري شوية، مجرد تفكير من غير تنفيذ إطلاقاً. يوم الإثنين إللي فات (14-4-2014) قررت أروح أقص شعري، و رحت قصيته. بعدها و أنا راجعة البيت بفكر في موضوع الشعر و كدة و لقيت إن فعلاً توقيت قرار و تنفيذ قص الشعر ده جاه مع أهم قرار لحياتي دلوقتي، و من غير ما أحس. و لقيت إني شايفة نفسي أوي في المقولة دي.
من ناحية قصة شعري، فـ أنا حابة نفسي فشخ فيها، و حاسة بجمالي بطريقة بسيطة بس حلوة. حاسة كمان إني خفيفة و منتعشة جداً، و مع إني كُنت بأقدس شعري الطويل، بس دلوقتي حابة شعري كدة جداً فعلاً و متقبلاه و مش زعلت و لا للحظة واحدة لما الكوافيرة بدأت تقص شعري و حطته قدامي على الترابيزة.
غيروا كُل فترة في حاجات بسيطة فيكم يا جماعة (تسريحة الشعر، قصة الشعر، قصوا قُصة، غيروا ألوان المكياج إللي بتستعملوه -لو فاتحة هتبقى حلوة جداً-.. إلخ) و هتحسسكم بفرق كبير جداً و تحسسكم بجمالكم فعلاً. و البنات مش ضروري تكونوا غير محجبات، إنتوا بتعملوا ده لنفسكم قبل أي حد ثاني.
إتبسطوا بجمالكم و اظهروه.